Pjesë të avionit luftarak amerikan F-35 kanë përfunduar në Hong Kong pas një gabimi në transport, duke shkaktuar shqetësim në Pentagon dhe në Kongresin amerikan. Sipas Bloomberg, një punonjës nuk ka marrë në konsideratë një email paralajmërues, ku thuhej se ngarkesa nuk lejohej të kalonte përmes Hong Kongut. Bëhet fjalë për dy komponentë të F-35, një mbulesë transparente të kabinës së pilotit dhe një pjesë të hapësirës së brendshme të armatimit. Pjesët ishin dërguar nga Australia drejt Shteteve të Bashkuara për t’u vlerësuar për riparim ose nxjerrje jashtë përdorimit. Transporti ishte organizuar nga kompania DSV. Rruga fillestare parashikonte kalimin përmes Koresë së Jugut dhe Tajvanit, por pas një vonese në nisje nga Australia, itinerari u ndryshua përmes Hong Kongut për të përshpejtuar dorëzimin. Ky ndryshim binte ndesh me kufizimet amerikane për transportin e teknologjisë ushtarake.