Detaje të reja janë bërë me dije lidhur me operacionin masiv të policisë së Elbasanit dhe Korcës, në bazë të së cilës u vunë në pranga 26 persona, nën akuzën e futjes së drogës dhe femrave brenda qelisë së burgut për personat Vip. Si dhe dy gra u lanë në arrest shtëpiak, pasi akuzohen për futjen e sendeve të paligjshme në burgje. Mes personave të arrsestuar janë dy emra të njohur për drejtësinë, por edhe për publikun shqiptar. Bëhet fjalë për Leo Osmani dhe Delin Hajdari, të dy të dënuar për masakrën e Vlorës së ndodhur në 29 korrik 2019. Osmani hapi zjarr në një resort në Vlorë, për pasojë la të vdekur tre persona. Tre viktimat ishin, Diana Ademi nga Vlora 52 vjeçe; Sokol Isufaj nga Fieri 34 vjeç dhe Serdi Bajlozi nga Prrenjasi 17 vjeç. Hajdari dyshohet për kryerjen e veprave penale “Futja ose mbajtja e sendeve të ndaluara në institucionin e ekzekutimit të vendimeve me burgim” dhe “Organizimi ose ushtrimi i veprimtarive të lojrave të fatit në kundërshtim me ligjin”. Ndërsa Osmani, është ndaluar për veprat penale “Futja ose mbajtja e sendeve të ndaluara në institucionin e ekzekutimit të vendimeve me burgim” dhe “Organizimi ose ushtrimi i veprimtarive të lojrave të fatit në kundërshtim me ligjin”. Sipas policisë, përvec futjes së sendeve të paligjshme në qeli, Osmani dhe Hajdari akuzohen edhe për organizim lojërash fati brenda burgut.