Ministri i Brendshëm i Kosovës, Xhelal Zveçla, nëpërmjet një postimi në rrjetet sociale, la të kuptohet se audio-incizimet e deputetes së Vetëvendosjes Mimoza Kusari-Lila me ish-deputetin e Listës Serbe, Sllavko Simiç janë dorëzuar te mediat kosovare nga presidenti serb Aleksander Vuçiç. I menjëhershëm ka qenë edhe reagimi i Asociacionit të Gazetarëve të Kosovës, që e ka cilësuar gjuhën e përdorur nga ministri Zveçla ndaj mediave dhe gazetarëve, si të rrezikshme. “Ministri Sveçla insinuon se audio-incizimet e shefes së Grupit Parlamentar të partisë së tij, Mimoza Kusari Lila me ish-deputetin e Listës Serbe, Sllavko Simiç u janë dhënë medieve kosovare nga presidenti serb, Aleksandar Vuçiç. Gjuha e tillë rrezikon sigurinë e gazetarëve të përmendur dhe është pjesë e tentimit të vazhdueshëm të pushtetit për të frikësuar mediat”, thuhet ndër të tjera në reagimin e Asociacionit të Gazetarëve në Kosovë. Pretendimet e ngritura nga ministri i Brendshëm Zveçla, u kritikuan edhe nga partitë e mëdha opozitare, duke e cilësuar një gjuhë të pamatur, ofenduese dhe nxitëse të konflikteve. Në reagimin e tij për çështjen në fjalë, ministri I Brendshëm i Kosovës, Xhelal Zveçla deklaroi se Aleksander Vuçiçiç po e humb betejën me Kurtin dhe po përdor taktika të tilla, duke publikuar audio-incizime në mediat kosovare për të destabilizuar qeverinë.