Kremlini thotë se përpjekjet e SHBA-së për paqe në Ukrainë janë shumë të rëndësishme dhe mund të ndihmojnë në zgjidhjen e konfliktit. Megjithatë, zëdhënësi Dmitry Peskov shtoi se Moska mban një qëndrim negativ ndaj propozimeve evropiane për garancitë e sigurisë për Ukrainën. Ai përsëriti qëndrimin e hershëm të Rusisë se asnjë trupë nga vendet e NATO-s nuk duhet të vendoset në Ukrainë. Lidhur me zhvillimin e bisedimeve të paqes në nivel të lartë me Ukrainën, Peskov tha se takime të tilla duhet të jenë të përgatitura mirë që të jenë efektive. Pas raportimeve se sulmet ruse gjatë natës në Ukrainë kishin në shënjestër infrastrukturën energjetike të vendit, Peskov tha se Moska godet vetëm objektiva ushtarake dhe të lidhura me ushtrinë. Ndërkohë, Peskov tha se po bëhen përgatitje aktive për udhëtimin e ardhshëm të Presidentit rus Vladimir Putin në Kinë, duke e quajtur vizitën "të pashembullt". Putin dhe më shumë se 20 liderë të tjerë botërorë do të marrin pjesë në samitin e Organizatës së Bashkëpunimit të Shangait (SCO), që do të mbahet në qytetin portual verior të Tian’jin-it nga 31 gushti deri më 1 shtator. Peskov konfirmoi se Putin do të vizitojë më pas Vladivostokun, një qytet portual i madh rus pranë kufijve me Kinën dhe Korenë e Veriut, më 5 shtator.