Policia e Fierit ka finalizuar një tjetër operacion antidrogë, duke goditur një rast të shpërndarjes së lëndëve narkotike në zonën e Roskovecit. Si rezultat i operacionit, u arrestua në flagrancë një 31 vjeçar, banues në Roskovec, i cili dyshohet se siguronte lëndë narkotike të llojit kanabis sativa, e ndante në doza dhe e tregtonte në lagje të ndryshme të qytetit. Gjatë kontrollit fizik dhe më pas në banesën e tij, policia gjeti dhe sekuestroi me cilësinë e provës materiale 3.6 kilogramë kanabis sativa, një pjesë e ndarë në doza gati për shitje, një peshore elektronike që shërbente për ndarjen e lëndës, një shumë parash, e dyshuar e përfituar nga aktiviteti kriminal, dy telefona celularë që përdoren për komunikim me blerësit. Operacioni u zhvillua nga specialistët e Seksionit për Hetimin e Narkotikëve në bashkëpunim me Forcën Operacionale të Drejtorisë Vendore të Policisë Fier.