Policia e Malit të Zi ka vënë në pranga kryetarin e Komunës së Ulqinit, Loro Nrekic, dhe katër zyrtarë të tjerë lokalë. Autoritetet nuk e kanë konfirmuar ende këtë zhvillim zëvendëskryeministri Dritan Abazovic e pohoi në profilin e tij në Tëitter, duke treguar dhe shkakun e arrestimit. “Kryetari i Ulqinit dhe degës lokale të Partisë Demokratike të Socialistëve është arrestuar, së bashkku me disa zyrtarë të tjerë. Arsyeja: punësimi partiak”, tha Abazovic, I cili shtoi se qeveria e re “është e vendosur t`I japë fund të gjithë abuzimeve”. Policia po merr në pyetje edhe sekretarin për Financa të Komunës së Ulqinit, Sead Osmanovic, sekretarin për Aktivitete Komunale dhe Mbrojtje të Mjedisit, Mustafa Gorana, drejtorin e Shërbimit të Mbrojtjes dhe Shpëtimit, Saubih Mehmeti, dhe sekretarin e Policisë Komunale, Milazim Mustafa. Që prej zgjedhjeve lokale të vitit 2018 në Ulqin, qyteti drejtohet nga një koalicion i udhëhequr prej Partisë Demokratike e Socialistëve. Si rezultat i zgjedhjeve parlamentare të mbajtura në fund të gushtit, Mali I zi qeveriset nga ekzekutivi i krijuar në 4 dhjetor dhe I udhëhequr nga ish-opozita, përkatësisht Fronti Demokratik, Demokratët dhe Lëvizja Qytetare URA. Ndërsa Partia Demokratike e Socialistëve ka dalë në opozitë pas tre dekadash në pushtet.