Një shtetas është arrestuar nga uniformat blu të Shkodrës, pasi qarkullonte i armatosur me kallashnikov dhe thikë. Ky shtetas u ndalua në fshatin “Vrakë”, nga shërbimet e Patrullës së Përgjithshme. Gjatë kontrollit të mjetit të tij shërbimet e policisë i kanë gjetur dhe sekuestruar në cilësinë e provës materiale, një armë zjarri kallashnikov me krëhër me municion luftarak dhe një mjet prerës thikë. Bëhet me dije se vijon puna në bashkëpunim me Prokurorinë për zbardhjen e qëllimit që ky shtetas lëvizte i armatosur. Një ditë më parë u arrestuarnjë 35-vjeçar pasi u kap me kallashnikov, në lokalin në Durrës ku u konfliktua për motive të dobëta. Ngjarja u shënua në ambientet e një lokali në lagjen numër 13, teksa u ndërhy nga policia me qëllim parandalimin e përshkallëzimit të konfliktit, si dhe zbardhjen e rrethanave të tij. Mbi 35-vjeçarin rëndojnë veprat penale mbajtja pa leje dhe prodhimi i armëve, armëve shpërthyese dhe i municionit.