Policia gjermane ka vënë në pranga dy shtetas shqiptarë, të shpallur në kërkim ndërkombëtar nga autoritetet shtetërore në Shqipëri. Falë operacionit ‘Exchange 2’, në pranga kanë rënë dy shtetasit Brian Syzo 44-vjeç dhe Klevis Gjonkolaj 20 vjeç. 44-vjeçari Brian Syzo, në vitin 2022, Gjykata e Korçës i ka caktuar masën e sigurisë “Arrest në burg”, për veprën penale “Prodhimi dhe shitja e narkotikëve”, pasi dyshohet se në mënyrë të përsëritur, ka shitur lëndë narkotike Kokainë, në lokalin e tij, në Pogradec. Gjatë operacionit u kap dhe 20-vjeçari Klevis Gjonkolaj, i dënuar si bashkëpunëtor për vjedhje të kryer në Paskuqan, në 2023-in. Në vitin 2024, Gjykata e Tiranës e ka dënuar 20-vjeçarin, me 6 muaj burgim, për vjedhje. Vijon bashkëpunimi ndërmjet strukturave homologe të Interpolit, për të finalizuar procedurat për ekstradimin e 2 shtetasve, në Shqipëri.