Një ekip prej 10 alpinistësh nepalezë kanë vendosur një rekord të ri botëror duke u bërë i pari që arrin majën K2, e dyta më e larta në botë, në dimër. Alpinisti Nimsdai Purja, një nga anëtarët e grupit, tha se kishin arritur majën në orën 17.00 sipas orës lokale. Dhjetëra alpinistë i janë drejtuar malit 8611 metra të lartë këtë dimër me shpresë që të arrijnë të njëjtin sukses. Por, një alpinist spanjoll, humbi jetën pasi u rrëzua këtë fundjavë, ndërsa po zbriste. K2, që është vetëm 200 metra më i ulët se everesti, është pjesë e vargmalit Karakoram, që shtrihet në kufirin mes pakistanit dhe kinës. Një nga 14 malet e vetme që kapërcejnë lartësinë e 8 mijë metrave, ai konsiderohet edhe më i vështiri gjatë dimrit. Ai është quajtur shpesh mali i egër, një emër që iu vendos pasi alpinisti amerikan George Bell, tha për përpjekjen e tij në 1953: është një mal i egër që përpiqet të të marrë jetën. Që nga përpjekja e parë në vitet 1987-1988, vetëm një grusht ekspeditash dimërore kanë tentuar të ngjisin K2. Deri më tani, asnjë prej tyre nuk ka arritur në një lartësi më të madhe se 7650 metra. Guidat nepaleze, zakonisht sherpa etnike, konsiderohen si shtylla e industrisë së alpinizmit përreth Himalajeve, dhe rregullisht ndihmojnë të huajt në ekspedita.