Rreth 30 liderë perëndimorë kanë mbërritur në paris për tu takuar me presidentin ukrainas Volodymyr Zelenski e për të diskutuar se si të forcohet mbështetja ushtarake. Ata po ashtu do të shqyrtojnë përpjekjet për armëpushim dhe të vlerësojnë se çfarë roli mund të luajnë nëse arrihet një marrëveshje paqeje me Rusinë. Samiti i tretë i atij që Franca dhe britania e kanë quajtur koalicioni i "të vullnetshmëve" mbledh së bashku liderë si kryeministri polak Donald Tusk, sekretari i përgjithshëm i NATO-s Mark Rutte, kryeministrja italiane Giorgia Meloni dhe zëvendëspresidenti turk Cevdet Yılmaz. "Para së gjithash ne do të diskutojmë mbështetjen e menjëhershme për Ukrainën. Ajo duhet të vazhdojë sepse është e nevojshme të vazhdohet rezistenca," u tha presidenti Emmanuel Macron gazetarëve në një konferencë shtypi me Zelenskin. Macron u zotua për 2 miliardë euro të tjera mbështetje ushtarake franceze për Ukrainën dhe partnerët e tjerë mund të shpallin paketa të tjera ndihme gjatë ditës. Formati synon të krijojë një rol për Evropën në çdo bisedë për përfundimin e konfliktit. Ndërsa Shtetet e Bashkuara nuk janë të pranishme, zyrtarët francezë thonë se rezultatet e samitit do të ndahen me administratën amerikane. Diskutimet do të fokusohen në atë se si të forcohet Ukraina ushtarakisht për të penguar sulmet e ardhshme dhe si të monitorohen armëpushimet e kufizuara mbi objektivat detare dhe infrastrukturën energjetike, siç u diskutua në bisedimet e udhëhequra nga SHBA këtë javë në Arabinë Saudite. Përpjekjet evropiane, të udhëhequra nga Macron dhe kryeministri britanik Keir Starmer, për të krijuar garanci sigurie për Ukrainën variojnë që nga dërgimi i trupave e deri në shqyrtimin e alternativave të tjera për shkak të kufizimeve politike dhe logjistike dhe perspektivës që Rusia dhe SHBA të kundërshtojnë planet e tyre.