Greqia po përballet me një situatë të paprecedentë pas rrezimit të një avion të ngarkuar me 11.5 tonë municione serbe në Kavala. Nje ekip elitar i kompanisë së Mbrojtjes Biologjike Bërthamore të Greqisë ka mbërritur në zonë pas zbulimit të një lënde të panjohur të bardhë, e cila ka alarmuar autoritetet. Kryetari i bashkisë së Kavales njoftoi pak më parë vendosjen e gjendjes së jashtëzakonshme në fshatrat përreth zonës ku ra avioni i mbushur me armë gjatë mbrëmjes të së dielës. Duke komunikuar me gazetarët, ai kërkoi nga banorët e fshatrave që të mos i afroheshin zonës as në këmbë, ndërkohë që lëvizja e makinave dhe mjeteve bujqësore në zonë është e ndaluar pasi sipas tij nuk dihet ende se sa mund të jenë shpërndarë copat e shkatërruara të avionit të rrëzuar, por edhe armët që ndodheshin në të.