Arben Ahmetaj nuk do ta ketë të lehtë me Drejtësinë, nëse gjithmonë kjo e fundit do të funksionojë si duhet dhe ashtu siç presin shqiptarët. I zhveshur nga të gjitha postet politike, me përjashtim të mandatit të deputetit, Ahmetaj shkoi me pushime edhe në resortet e shtrenjta të Alpeve të Zvicrës. Ndërsa në Shqipëri vijon të jetë kryefjalë e të gjitha mediave, pas denoncimit në SPAK të gazetarit Adriatik Doçi, se kishte përfituar pagesa nga Klodian Zoto për të qëndruar në hotele luksoze, gjatë kohës që ishte minister, në shumë raste edhe i shoqëruar. Provat e pakontestueshme ndaj Ahmetajt për shpërdorim detyre nuk u përfshinë në dosjen e inceneratorëve, që hetuan prokurorët Eneid Nakuçi dhe Klodian Braho. Në momentin kur ato u bënë publike, Ahmetaj mundi të fitojë me procedurë, sepse një tjetër prokuror i SPAK mendoi të linte në fuqi vendimin e kolegëve të tij për mospërfshirjen e provave në dosje. Por sa do të zgjasë liria e Arben Ahmetajt? Burime nga SPAK thanë për Top Neës se nga disa dosje nën hetim, emri i ish-ministrit rezulton jo si person nën hetim, por si person që ka dijeni për rrethanat e ngjarjes. Pra, herët ose vonë, Ahmetaj do të jetë dëshmitar për “bëma” që zënë fill në kohën kur ishte ministër dhe ish-zëvendëskryeministër.