Britania e Madhe ka vendosur që të heqë të gjitha masat anti-Covid, duke filluar nga 19 korriku. Kryeministri britanik Boris Johnson njoftoi planet e qeverisë së tij për të hequr pothuajse të gjitha masat kufizuese nga 19 korriku. Duke konfirmuar fjalët për heqjen e plotë të kufizimeve, kryeministri Johnson tha se të gjitha bizneset mund të rihapen, përfshirë edhe klubet e natës. Do të hiqen kufizimet në tubimet e brendshme dhe të jashtme, po ashtu hiqet respektimi i rregullit të distancimit social me një metër. Në Britaninë e Madhe hiqet edhe masa për mbajtjen e detyrueshme të maskës. Nga 19 korriku, britanikët e vaksinuar me dy doza do jenë në gjendje të udhëtojnë drejt vendeve në listën e verdhë, në gjithë vendet e Evropës pa qenë nevoja të karantinohen në kthim për dhjetë ditë, siç është momentalisht.