Një grup hakerash ka përdorur kredenciale të lidhura me prokurorë për të hyrë në mënyrë të paligjshme në sistemet e drejtësisë në Brazil, duke mundësuar lirimin mashtrues të disa të burgosurve në Belo Horizonte. Sipas autoriteteve, incidenti ndodhi pas një sulmi kibernetik në bazat e të dhënave gjyqësore, ku u futën urdhra lirimi të rremë në regjistrat e Këshillit Kombëtar të Drejtësisë (CNJ). Si pasojë, katër burra u liruan nga Burgu, “përmes derës së përparme”, vetëm disa ditë pasi ishin arrestuar. Të liruarit ishin pjesë e një grupi prej nëntë personash të arrestuar më 10 dhjetor, të dyshuar si anëtarë të një rrjeti hakerash dhe mashtruesish të specializuar në manipulimin e dokumenteve gjyqësore. Ata ishin ndaluar për të njëjtin lloj aktivitetesh kriminale. Autoritetet konfirmojnë se vetëm një nga katër të burgosurit e liruar është rikapur, ndërsa tre të tjerët vazhdojnë të jenë në arrati. Ndërkohë, hetimet për identifikimin e autorëve të sulmit dhe bashkëpunëtorëve të mundshëm janë në vijim. Këshilli Kombëtar i Drejtësisë ka përjashtuar ekzistencën e problemeve strukturore në sistemet e tij, duke theksuar se sulmi u realizua përmes përdorimit mashtrues të kredencialeve autentike dhe jo për shkak të dobësive teknike të platformës.