Ekipet e shpëtimit nxorën të tjerë trupa nga deti të martën, dhe numri i viktimave në tragjedinë më të fundit të emigrantëve, pranë brigjeve të italisë, shkoi në 65. Prokurorët janë në proces të identifikimit të kontrabandistëve të dyshuar, që supozohet se kanë marrë deri në 8.000 euro për çdo person që ka ndërmarrë “udhëtimin e vdekjes” nga Turqia për në Itali. Autoritetet i kanë dhënë më shumë kohë procesit të identifikimit të trupave, pasi familjarët dhe miqtë kanë arritur në qytetin Krotone të Kalabrisë, me shpresën që të gjejnë më të dashurit e tyre, disa prej të cilëve janë nga Afganistani. “Po kërkoj tezen time dhe tre fëmijët e saj”, tha Aladdin Mohibzada, që shtoi se ai ka udhëtuar me makinë për 25 orë nga Gjermania për të arritur te morgu i improvizuar në një stadium sportiv. Ai tha se kishte kuptuar se tezja dhe dy fëmijët e saj kanë vdekur, por fëmija tjetër 5 vjeç ka shpëtuar dhe është duke u strehuar në një qendër për të mitur.