Më shumë se 3 mijë persona, përfshirë civilë dhe personel ushtarak, janë vrarë në Lindjen e Mesme që nga fillimi i konfliktit me Iranin dy javë më parë. Sipas ‘CNN’, të paktën 12 anëtarë të stafit mjekësor u vranë pasi një sulm izraelit goditi një qendër kujdesi shëndetësor në qytetin jugor libanez Bourj Qalaouiyeh. Më shumë se 1300 persona janë vrarë që nga fillimi i konfliktit në Iran, sipas ambasadorit iranian në OKB. Ndërkohë, Agjencia e Lajmeve të Aktivistëve të të Drejtave të Njeriut raportoi se 1298 civilë, përfshirë 205 fëmijë kanë humbur jetën që nga fillimi i luftës. Të paktën 826 persona janë vrarë që kur Izraeli nisi sulmet ajrore në Liban, mes viktimave janë edhe 106 fëmijë. 15 izraelitë janë vrarë që nga fillimi i konfliktit në Izrael. Gjithsej 13 ushtarë amerikanë janë vrarë që nga fillimi i konfliktit. 6 prej tyre humbën jetën kur avioni i tyre i furnizimit me karburant u rrëzua në Irak, ndërsa 6 të tjerë u vranë në një sulm iranian ndaj një qendre të improvizuar operacionesh në Kuvajt Të paktën 32 persona janë vrarë në Irak, shumica pjesëtarë të Forcës së Mobilizimit Popullor. Po ashtu, një ushtar francez u vra në një sulm ndaj një baze ushtarake në Kurdistanin irakian. Gjashtë persona kanë humbur jetën në Kuvajt, përfshirë një vajzë 11-vjeçare që vdiq nga plagët pasi një copë predhe ra mbi një zonë banimi më 4 mars. Një shtetas indian humbi jetën pasi një mjet pa pilot sulmoi cisternën e naftës ku ai punonte, 52 milje detare larg bregdetit të Omanit. Ndërkohë dy persona u vranë kur një predhë ushtarake goditi një ndërtesë banimi në qytetin Al-Kharj më 8 mars në Arabinë Saudite.