Detaje të reja kanë dalë në dritë në lidhje me vrasjen e gazetarit grek në prag të shtëpisë së tij më 9 prill të këtij viti. Policia po përpiqet të marrë pamjet filmike të tre ditëve të fundit para se të ekzekutohej. Ende nuk ka asnjë shenjë se ku ndodhet motori me të cilin dy persona lëvizën pranë shtëpisë së George Karaivaz dhe e qëlluan atë me armë. Së fundmi janë hedhur dyshime se ekziston mundësia që motori është fshehur në një vend shumë të sigurt ose është çmontuar me qëllim për të fshehur gjurmët e krimit. Ndërkohë ekspertët dyshojnë se viktima u bë një shënjestër e kriminelëve grekë dhe shqiptarë. Oficerët që janë ngarkuar në zbardhjen e ngjarjes po tentojnë të deshifrojnë laptopin, telefonin dhe thirrjet e fundit që ka marrë gazetari. Sipas mediave greke kanë qenë tre grupe që kanë marrë pjesë në ekzekutimin e tij. Analistët e Sigurimit thonë që kjo nuk ishte hera e vetme që u bë një plan i tillë për të eleminuar gazetarin, por arsyet se përse është anuluar janë ende të panjohura.