Numri i shqiptarëve të punësuar me rrogë minimale, ose pranë rrogës minimale të caktuar nga Qeveria ka rënë në harkun kohor të një viti me mbi 10 për qind. Megjithatë, 400 mijë të punësuar në Shqipëri paguhen aktualisht më pak se 50 mijë lekë në muaj, aq sa është plani i qeverisë për të caktuar pagën minimale, duke nisur që nga muaji janar i vitit të ardhshëm. Të dhënat zyrtare mbi nivelin e pagave në tremujorin e dytë të këtij viti tregojnë se shifra përbën rreth 35 për qind të të punësuarve në total, që në të njëjtën periudhë INSTAT raporton se janë pak më shumë se 1 milionë e 170 mijë vetë. Hyrja në fuqi në janar të vitit të ardhshëm të rritjes së pagës minimale në 50 mijë lekë, nisur nga numri i madh i të punësuarve nën nivelin e kësaj page pritet të ndikojë në rritjen e kostove për bizneset, që pas pandemisë, veç kësaj po përballen edhe me mungesën e burimeve njerëzore, që citohet si një prej treguesve kryesorë në raportin e Dhomës Amerikane të Tregtisë për klimën e biznesit.