Kërkuesit në Tibet kanë zbuluar 33 viruse, 28 nga të cilët të panjohur për shkencën, në një copë akulli nga një akullnajë që është formuar rreth 15 mijë vite më parë. Ekipi nga universiteti i shtetit të Ohio-s, analizoi dy bërthamat e akullit nga shtresa e akullit Guliya në Kunlun Shan, në pllajën tibetiane Qinghai. Duke përdorur një metodë të re të analizës së mikrobeve dhe viruseve në kampionët e akullit, pa i kontaminuar ato, kërkuesit dolën në përfundimin se viruset kishin jetuar në tokë ose në bimë. Zbulimi, sipas ekipit, mund të ndihmojë shkencëtarët të kuptojnë më mirë se si viruset kanë evoluar gjatë shekujve. Bazuar në ambjentin dhe krahasimin me virueset e njohura, ekipi beson se viruset e sapo zbuluara kanë ardhur nga toka apo nga bimët dhe jo nga kafshë apo njerëz të infektuar. Sipas kërkuesve, studimi i viruseve të ruajtur në akullnaja, është një fushë relativisht e re por do të bëhet gjithnjë e më e rëndësishme ndërsa toka ngrohet dhe akullnajat shkrijnë.