2 qershori është shpallur ‘Ditë zie kombëtare’ në nderim të ish-Presidentit të Republikës, njëherësh ish-ministër dhe ish deputet, Bujar Nishani. Vendimi është marrë në mbledhjen e së hënës të qeverisë shqiptare, teksa është vendosur që qeveria të mbulojë shpenzimet e varrimit të ish-Presidentit dhe ceremonialit mortor. Në Vendimin e Këshillit të Ministrave që mban firmën e zëvendëskryeministrit Arben Ahmetaj, ndër të tjera thuhet se u vendos për: “Shpalljen ditë zie kombëtare, ditën e enjte, datë 2.6.2022, në nderim të të ndjerit, z. Bujar Nishani, ish-President i Republikës së Shqipërisë, ish-ministër dhe ish-deputet. Në të gjitha institucionet shtetërore dhe publike të ulet flamuri kombëtar në gjysmështizë”. Cermonia e homazheve shtetërore është përcaktuar në këtë VKM, dhe zhvillohet këtë të enjte nga ora 10:00 deri në orën 12:00.