Pothuajse 150 minatorë u bllokuan nën tokë në Ukrainën lindore pasi Rusia bombardoi një minierë qymyri, ku humbi jetën një person. Një minator u vra dhe tre u plagosën nga bombardimet në minierën e qymyrit, ndërsa 146 të tjerë mbetën të bllokuar brenda galerive të errëta. Miniera i përket DETK, kompanisë më të madhe të energjisë në Ukrainë. Një zëdhënës i saj tha: "Sulmi dëmtoi ndërtesat dhe pajisjet e kompanisë dhe shkaktoi ndërprerje të energjisë elektrike. Në atë kohë, 146 minatorë ishin nën tokë dhe përpjekjet për t'i nxjerrë ata në sipërfaqe janë duke vazhduar". Vendndodhja e saktë e minatorëve të bllokuar nuk është bërë e ditur nga kompania, por një drejtues sindikate raportoi se ata ishin bllokuar në Dobropillia në Donetsk. U raportua më vonë gjatë ditës se të gjithë minatorët ishin shpëtuar dhe ishin nxjerrë në sipërfaqe. Donetsku, gjysma e rajonit të Donbasit, është pushtuar kryesisht nga Rusia, por "brezi i tij i famshëm i fortifikuar" është ende i pakapur. Donbasi është zemra industriale e Ukrainës dhe mban rezerva të mëdha qymyri dhe metali nën tokë. Rusia ka kërkuar që Ukraina të dorëzojë toka në këmbim të paqes, një propozim që Zelensky e hodhi poshtë menjëherë.