13 persona kanë humbur jetën si pasojë e koronavirusit në 24 orët e fundit, ku 5 prej tyre janë nga Tirana dhe viktimat e tjera nga zonat e ndryshme të vendit. Numri total i viktimave që nga fillimi i pandemisë ka shkuar në 685 persona. Ndërkaq i lartë vijon të mbetet edhe numri i rasteve të reja, ku këtë të shtunë ministria e Shendetësisë raportoi për 737 të infektuar me covid 19, si rezultat i 2470 testimeve të kryera. Edhe në këto të dhëna rezulton se Tirana, vijon të mbetet vatra kryesore e epidemisë, me 396 raste të reja, 54 janë në Fier, 45 në Kavajë, 34 në Elbasan, 32 në Durrës, 31 në Korçë, 25 në Lushnje, 23 raste në Vlorë, 17 në Pogradec, 16 në Librazhd, 10 në Kukës, 9 në Kuçovë, nga 6 raste në Tepelenë, Malësi e Madhe dhe më pak raste në zonat e tjera të vendit. Në 3 spitalet COVID, po trajtohen 443 pacientë, 10 në terapi intensive, 5 pacientë janë të intubuar. Në 24 orët e fundit janë shëruar 414 qytetarë, duke e çuar numrin e të shëruarve 15.469 që nga fillimi i epidemisë, ndërsa raste aktive në vend janë 16 042 persona. Në total numri i infektimeve ka shkuar në 32.196 persona. Ministria e Shendetesisë, u ka bërë thirrje qytetarëve të respektojnë masat për parandalimin e COVID19, duke mos e ulur asnjë moment vigjilencën për respektimin e rregullave të higjienës, distancimit fizik dhe mbajtjen e maskës në çdo ambient jashtë shtëpisë. Po ashtu u është bërë apel personave të konfirmuar pozitiv apo ata që janë në pritje të përgjigjes së testit, të qëndrojnë të izoluar, duke respektuar detyrimin e vetekarantinimit.