Lufta ndaj krimit të organizuar dhe hetimet për dosjet e nxehta do kenë një kosto rreth 12 miliardë lekë gjatë dy viteve të ardhshme, të cilat do të mbulohen nga buxheti i shtetit dhe fondet e donatorëve. Buxheti i hedhur për konsultim publik parashikon disa objektiva që duhet të përmbushin uniformat blu në bashkëpunim të ngushtë me Interpol, FBI-në Shqipëtare dhe Prokurorinë e Posaçme. BKH do të krijojë një sistem analize për vlerësimin e kërcënimeve në lidhje me krimin e organizuar dhe korrupsionin, i cili ka një kosto 45 milionë lekësh dhe do të mbulohet 100 % nga buxheti i shtetit. Për regjimin e posaçëm në burgun e sigurisë së lartë 41 Biss do të alokohen në financat e drejtorisë së përgjithshme të burgjeve 217 milionë lekë. Huazuar nga sistemi italian, regjimi 41 biss ka një numër të reduktuar të burgosursh, të cilët përbëjnë rrezikshmëri të lartë, dhe po aq të larta janë edhe paratë që shkojnë për të garantuar masa të rrepta sigurie.