Komisioni Qendror i Zgjedhjeve i ka dërguar një letër Drejtorisë së Përgjithshme të Gjendjes Civile, pas ankesave të qytetarëve për ndërrim adresash. KQZ shtron 10 pyetje në letër, të tilla si në cilën datë është nxjerrë ekstrakti i popullsisë, cili është kriteri i ekstradit të popullsisë së çdo qarku e të tjera. Po ashtu, Komisioni Qendror i Zgjedhjeve bën pyetje nëse ekziston mundësia që zgjedhësit në jenë në listat e një qarku për efekt të zgjedhjeve. Gjithashtu, KQZ ngre pyetje nëse mund t’i vihet apo jo në dispozicion të Komisionit Qendror të Zgjedhjeve, produkti përfundimtar i projektit të popullimit të adresave etj. Ndërkohë, edhe Partia Demokratike me anë të një kërkesë zyrtare i është drejtuar Komisionit Qendror të Zgjedhjeve që të shtyhet miratimi i aktit për shpërndarjen e mandateve në zgjedhjet e 25 prillit . Ata kërkojnë një afat prej 7-10 ditësh, kjo sepse sipas tyre ka pasur zhvendosje të vendbanimeve të qytetarëve, siç e kanë denoncuar më herët. Nisur nga fakti që ka pasur ndryshime të mandateve, ku Gjirokastra dhe Dibra humbën nga një mandat, dhe iu dha Tiranës, demokratët kërkojnë që KQZ të nis një hetim. Duke qenë se përllogaritja e ndarjes së mandateve kryhet duke marrë për baze numrin e popullsisë dhe jo numrin e zgjedhësve, si dhe duke konsideruar se për shkak te numrit të ndryshëm në raport me atë të vitit 2017 ka lëvizje të numrit te mandateve, PD kërkon të hetohet se mbi c'bazë janë kryer përllogaritjet.