Pas tërheqjes së Albin Kurtit që pranoi edhe mbajtjen e zgjedhjeve të reja në 4 komunat me shumicë serbe në veri, lind pyetja se si do të veprohet në Kosovë. Këshilltari për Mediat i Presidencës së Kosovës, Bekim Kupina thotë se për të ndryshuar kryetarët e zgjedhur në veri ka dy mënyra të përcaktuara në ligj. E para është që kryetari aktual të paraqesë dorëheqje, ndërsa e dyta është që 20% të votuesve të komunës të dorëzojnë një peticion për të organizuar votim për largimin e kryetarit të komunës. Mënyra e dytë, thotë Kupina është propozuar si alternativë edhe nga vetë Presidentja e Kosovës Vjosa Osmani. Në momentin që plotësohen kushtet ligjore, Presidentja bën shpalljen e zgjedhjeve të reja. Me dakordimin e arritur në Bratisllavë të hënën Kosova duhet të përmbushë katër hapat brenda dy javësh. Hapi i parë është deklarimi publik se qeveria e Kosovës është e angazhuar për shtensionimin e situatës dhe se nuk do të ndërmarrë asnjë veprim që mund të shkallëzojë situatën në veriun e Kosovës. Kjo përfshin një zvogëlim të menjëhershëm për 25% të pranisë policore në dhe rreth ndërtesave komunale. Me hapin e dytë, Policia e Kosovës kryen vlerësime të rregullta të sigurisë bashkë me EULEX-in, dhe me KFOR-in, sipas nevojës, për të shikuar mundësinë për zvogëlim të mëtejmë të tërë pranisë policore në dhe rreth ndërtesave komunale. Hapi i tretë, Qeveria e Kosovës bën një deklaratë publike, për të mbështetur mbajtjen e zgjedhjeve të parakohshme në 4 komunat nveriore, pas verës. Kosova përkushtohet të sigurojë bazën e nevojshme ligjore për të mundësuar organizimin e zgjedhjeve. Ndërsa në hapin e katërt parashikohet që BE-ja të ftojë dy kryenegociatorët në Bruksel, për finalizimin e planit të sekuencimit për Marrëveshjen drejt rrugës për normalizimin e marrëdhënieve, pas të cilit do të fillojë zbatimi i të gjitha neneve të marrëveshjes.