Vetëm pak pasi zëdhënësi i BE-së Peter Stano i tregoi Serbisë përmes një deklarate të hapur se blloku pret distancim të saj nga Moska, presidenti serb Aleksandar Vuçic priti në një takim ambasadorin rus në Beograd, Aleksandar Bocan Harchenko, të cilin e informoi për atë që ai e ka përshkruar si “gjendje e vështirë” e serbëve në Kosovë. Vuçic shkroi në Instagram pas takimit se i ka treguar ambasadorit “ se sa e vështirë është pozita e popullit serb në Kosovë dhe se kanë gjetur mirëkuptim nga ana e palës ruse për këtë”. Sipas agjencise së lajmeve Beta, Bocan Harchenko ka thënë se Rusia është “e vetëdijshme për gjendjen e vështirë në Kosovë. “Kosova do të jetë një nga çështjet me prioritet gjatë sesionit ministror në seancën e Asamblesë së Përgjithshme të Kombeve të Bashkuara. Në tetor pritet një seancë e Këshillit të Sigurimit dhe gjithashtu do të ofrojë mundësi që Rusia ta paraqesë qëndrimin e saj parimor, bazuar në Rezolutën 1244, për mbrojtjen e serbëve që jetojnë në Kosovë”, citohet të ketë thënë ai. Rusia është ndër aleatet më të mëdha të Serbisë dhe Beogradi gëzon mbështetjen e saj të fuqishme në kundërshtimin e pavarësisë së Kosovës. Takimi i Vuçicit me ambasadorin rus në Beograd u mbajt në ditën kur shoqatat serbe bllokuan pikat kalimtare në pjesën serbe të kufirit me Kosovën, në shenjë proteste kundër mbylljes së institucioneve paralele serbe në veri.