Autori i vrasjes së 52 vjeçares Kozeta Teço në Pogradec, doli para togave të zeza, që i caktuan masën ‘arrest me burg’. Pas seancës, avokati i Ilirjan Selmanit, tha se klienti i tij mohon autorësinë e ngjarjes. “I mbrojturi prej meje në asnjë moment nuk e ka pranuar autorësinë e veprës penale, as në polici, as para gjykatës. Ka mbajtur një qëndrim që ka të bëjë me personalitetin e tij, kurrsesi ai nuk mund të kryejë këtë veprim të rëndë. Ai nuk ka pranuar që bashkëjetonte me viktimën. Paraqiti keqardhje për viktimën”, u shpreh avokati Denis Mekolli. 31-vjeçari dyshohet se i mori jetën 52-vjeçares dhe më pas i dogji banesën në mënyrë që të fshinte provat. Gjatë marrjes në pyetje në polici, Ilirjan Selmani pranoi disa episode, por jo që ta ketë kryer ai krimin. Por, policia dhe prokuroria e Korçës ka grumbulluar prova të mjaftueshme, të cilat dokumentojnë të gjithë dinamikën nga momenti i kryerjes së krimit, deri në largimin e autorit nga banesa e 52 vjeçares. Nga hetimet rezulton që autori i krimit, mbrëmjen e së dielës, ashtu si çdo natë tjetër, e kishte kaluar në shtëpinë e Teços, me të cilën kishte një lidhje prej disa vitesh. Dyshohet se mes çiftit të ketë pasur një grindje të çastit, e cila ka degraduar në dhunë fizike të Selmanit ndaj 52 vjeçares dhe në fund përfundoi me vrasjen e partneres dhe djegien e banesës. Autori i krimit njihej nga policia si përdorues i lëndëve narkotike, për shkak të të cilave ai shpesh herë shfaqte simptoma depresioni. Nga ana tjetër edhe viktima kishte shfaqur kohët e fundit probleme të shëndetit mendor.