Eduard Kukuan, ish ministër i Jashtëm i Sllovakisë, ligjvënës europian dhe shef i delegacionit të BE-së për Europën Juglindore, ndërroi jetë në moshën 82 vjecare. “Duke shërbyer në kohë të vështira, ai ia kushtoi jetën ndërtimit të Shërbimit të Jashtëm të Sllovakisë. Vendimet e tij mundësuan anëtarësimin tonë në Bashkimin Evropian dhe në NATO. Pa të, historia e Sllovakisë mund të ishte krejt ndryshe”, ka shkruar Ministria e Jashtme sllovake në Twitter. Arsyet e vdekjes nuk janë bërë të qarta. Sa kohë ishte në krye të delegacionit të BE-së, Kukan u shfaq si mbështetës i zjarrtë i integrimit europian të Kosovës e sidomos liberalizimit të vizave. “Ne do të vazhdojmë t’ju ndihmojmë në këtë aspekt, duke ju dhënë ndihmë dhe duke biseduar edhe me Komisionin Europian, në mënyrë që kjo situatë diskriminuese për popullin tuaj, të zgjidhet dhe ju të gëzoni udhëtimin pa viza dhe të lirshëm në zonën Shengen”, pati deklaruar ai tetorin e vitit 2013. Kosova mbetet ende vendi i vetëm në rajonin e Ballkanit Perëndimor, qytetarët e të cilit nuk mund të lëvizin lirisht në shtetet e bllokut europian. Kukan nuk u lëkund nga qëndrimi i tij pro-Kosovës, edhe pse Sllovakia është një nga pesë anëtaret e BE-së që nuk e kanë njohur ende pavarësinë e saj. Ai u shfaq dhe si mik i fortë i Shqipërisë, duke treguar pa hezitim përkrahjen e tij të plotë për integrimin europian të saj.