Rexhep Tajip Erdogan kërkon vërtet marrëdhënie më të mira me Washingtonin, por nga furnizimi me sistemin rus të mbrojtjes raketore, nuk heq dorë. Këtë, presidenti turk ia ka konfirmuar edhe presidentit amerikan, Joe Biden gjatë takimit të tyre më 14 qershor në Bruksel. “I thashë Bidenit se ata nuk duhet të presin ndonjë qëndrim tjetër të Turqisë në lidhje me F-35 (aeroplanët amerikanë) dhe sistemin S-400 (sistemi rus). Ne bëmë atë që duhej, paguam paratë e nevojshme për F-35”, pohoi Erdogan para gazetarëve gjatë një fluturimi nga Azerbajxhani. Blerja e sistemit rus nga ana e Ankarasë u kthye në mollë sherri me SHBA-në, duke i acaruar se tepërmi marrëdheniet e Turqisë me të dhe aleatët e tjerë të NATO-s, të cilët druhen se armatimi rus nuk është në përputhje me sistemin e aleancës dhe mund të kërcënojnë avionët luftarakë F-35 të SHBA-së. Vitin e kaluar, Uashingtoni e pezulloi Ankaranë nga programi i tij i avionëve luftarakë të fshehtë F-35. Biden dhe Erdogan u dukën optimistë pas takimit të tyre ballë për ballë, megjithate në fund nuk u njoftua ndonjë përparim i madh në lidhje me mosmarrëveshjet mes palëve që përfshijnë sistemin S-400, Sirinë dhe çështje të tjera.