Një video e jashtëzakonshme nga sulmi terrorist në Bondi Beach në australi, tregon një hero që afrohet pas njërit prej personave të armatosur dhe ia merr me forcë armën. Dymbëdhjetë persona kanë vdekur pasi dy persona të armatosur hapën zjarr në Bondi Beach të dielën në mbrëmje, kur po zhvillohej një festë hebraike. Videoja që ka bërë xhiron e rrjetit tregon një burrë që i afrohet njërit prej personave të armatosur, nga një parking në skajin verior të plazhit dhe më pas e rrëzon atë në tokë. Heroi më pas ia rrëmben armën agresorit dhe ia drejton atij. Autori i të shtënave rrëzohet në largim e sipër dhe më pas, qytetari që tani po quhet hero, e lëshon armën. Video të shumta të postuara në mediat sociale tregojnë dy persona të armatosur që qëndrojnë në një urë këmbësorësh që lidh Campbell Parade me Bondi Pavilion, duke qëlluar drejt një turme. Burrat mund të shihen duke qëlluar me armë drejt turmës ndërsa njerëzit filluan të bërtisnin dhe vraponin për t'u fshehur. Një numër njerëzish mund të shiheshin të shtrirë të plagosur dhe palëvizur në bar. Të tjerë ngjiteshin në ambulanca ndërsa kalimtarët përpiqeshin të ofronin ndihmë. Pamje të tjera tregonin oficerë policie që qëndronin pranë një arme të lënë në tokë. Policia konfirmoi se dy persona ishin arrestuar pak para orës 8 të mbrëmjes. "Dy persona janë në paraburgim në Bondi Beach; megjithatë, operacioni policor është duke vazhduar dhe ne i kërkojmë njerëzve të shmangin zonën", tha policia në një deklaratë. Shumë anëtarë të komunitetit hebre ishin mbledhur për një festë Hanukkah në zonë më herët gjatë mbrëmjes. Kryeministri i Nju Sauth Uellsit, Chris Minns, i përshkroi raportet dhe imazhet që vinin nga vendi i ngjarjes si "thellësisht shqetësuese".