Kremlini tha të dielën se deklaratat e Sekretarit të Përgjithshëm të NATO-s, Mark Rutte, në lidhje me përgatitjen për luftë me Rusinë ishin të papërgjegjshme dhe treguan se ai nuk e kuptonte vërtet shkatërrimin e shkaktuar nga Lufta e Dytë Botërore. Rutte, në një fjalim në Berlin të enjten, tha se NATO duhet të jetë "e përgatitur për shkallën e luftës që përjetuan gjyshërit ose stërgjyshërit tanë" dhe pohoi se "ne jemi objektivi i radhës i Rusisë". Kremlini ka hedhur poshtë vazhdimisht pretendimet e NATO-s dhe disa udhëheqësve evropianë se planifikon të sulmojë një anëtar të NATO-s duke i quajtur ato një "marrëzi" e shfrytëzuar nga udhëheqësit evropianë për të nxitur histeri anti-ruse. "Kjo duket si një deklaratë nga një përfaqësues i një brezi që ka arritur të harrojë se si ishte në të vërtetë Lufta e Dytë Botërore", i tha zëdhënësi i Kremlinit, Dmitry Peskov, gazetarit të televizionit shtetëror rus Pavel Zarubin. "Ata nuk kanë asnjë kujtim, dhe për fat të keq, Rutte, duke bërë deklarata të tilla të papërgjegjshme tregon thjeshtë se nuk e kupton se për çfarë po flet". Udhëheqësit evropianë dhe ukrainasë thonë se nëse Rusia fiton në Ukrainë, atëherë ajo do të sulmojë NATO-n. Moska thotë se zgjerimi i NATO-s në lindje është një kërcënim për Rusinë. Rusia ka thënë se nuk ka ndërmend të sulmojë NATO-n. Presidenti Vladimir Putin tha më herët këtë muaj se Rusia nuk dëshiron një luftë me Evropën, por nëse Evropa e fillon një të tillë, atëherë Rusia është gati dhe se një luftë e tillë do të përfundonte shumë shpejt.