Një prokuror në Stamboll ka vendosur në paraburgim tetë gazetarë, duke anuluar vendimin për lirimin e tyre pasi ata u arrestuan për mbulimin e protestave më të mëdha antiqeveritare në Turqi ndër vite. Ata po mbahen pasi fotografuan demonstratat masive antiqeveritare që kanë përfshirë Turqinë për herë të parë pas shumë viteve, të nxitura nga arrestimi i kryebashkiakut të Stambollit, Ekrem Imamoglu javën e kaluar. Ata po akuzohen gjithashtu për "pjesëmarrje në mitingje dhe marshime të paligjshme dhe kundwrshtim i urdhrit për t'u shpërndarë pavarësisht paralajmërimeve", treguan dokumentet e gjykatës. Vendimi i gjykatës u cilësua si "skandaloz" nga “Reporterët pa Kufij”, teksa Unioni i Fotoreporterëve në Turqi e ka denoncuar atë si "të paligjshëm, të pandërgjegjshëm dhe të papranueshëm". Imamoglu është një rival i fortë i presidentit turk, Rexhep Taip Erdogan, dhe kandidati i vetëm që shihet si i aftë për ta sfiduar atë në kutinë e votimit në zgjedhjet e ardhshme. Në të njëjtën ditë kur Imamoglu u arrestua edhe zyrtarisht, ai është emëruar gjithashtu si kandidat presidencial nga Partia e tij Republikane Popullore opozitare. Protestat kanë marrë një reagim gjithnjë e më të ashpër nga autoritetet turke. Ministri i Brendshëm ka thënë se 1,418 persona janë arrestuar në lidhje me demonstratat. Të martën në mbrëmje reagoi edhe presidenti i Turqisë, Erdogan, duke thënë se “është mirë që protestuesit ta dinë deri ku e kanë kufirin”. Duke folur në një vakt iftari në Ankara, Erdogani ka thënë se "ata që përhapin terror në rrugë dhe duan ta kthejnë këtë vend në zjarr nuk kanë të ardhme". "Rruga që ata marrin është një rrugë pa krye”, ka deklaruar presidenti turk.