Promovimi turistik, fluksi i të huajve në vend, por edhe një sërë aktivitetesh që Shqipëria gjithnjë e më shumë po tërheq, është reflektuar edhe në ecurinë e strukturave të akomodimit. Të dhënat e Institutit të Statistikave për muajin maj tregojnë se pati një rritje me 31.8% krahasuar me të njëjtën periudhë të një viti më parë. Vizitorët rezidentë shënuan një rritje prej 36.6%, ndërsa vizitorët jo-rezidentë (të huajt) u rritën me 19.6%. Turistët qëndruan më gjatë pranë hoteleve, apartamenteve me qira ditore apo edhe bujtinave në vend gjatë muajit maj. Me hyrjen në sezonin turistik, rritja e tyre me 31.5% u regjistrua më e lartë në zonat bregdetare. Ndërkohë, një përqindje e lartë e të huajve vizituan sitet kulturore në shumë qytete të Shqipërisë, kryesisht në rajonin qendror të saj. Një interes në rritje është vënë re edhe për Veriun e Shqipërisë, me një dyfishim të numrit të të huajve krahasuar me të njëjtën periudhë të vitit të kaluar. Rritja e kërkesës, por edhe përmirësimi i infrastrukturës dhe shërbimeve, ka ndikuar edhe në ndryshimin e nivelit të normës së shfrytëzimit neto të strukturave, e cila arriti në 28.7% në maj. Sa i përket prejardhjes së vizitorëve jo-rezidentë, në krye të listës qëndron Kosova me 15%, ndjekur nga Italia me 13% dhe Gjermania me 9%. Polonia dhe Franca kontribuuan përkatësisht me nga 8%, ndërsa 47% e vizitorëve vijnë nga vende të tjera.