Presidenti i Shteteve të Bashkuara, Donald Trump, ka kritikuar ashpër kryeministrin izraelit Benjamin Netanyahu, duke deklaruar se ai nuk po e vlerëson sa duhet rolin e Uashingtonit në arritjen e marrëveshjes me Iranin dhe në shmangien e një konflikti më të gjerë në Lindjen e Mesme. Në një intervistë për Neë York Times, Trump mbrojti përpjekjet diplomatike të administratës së tij për t’i dhënë fund përplasjes me Teheranin, duke argumentuar se marrëveshja e arritur shërben jo vetëm për interesat amerikane, por edhe për sigurinë e Izraelit. Duke iu referuar drejtpërdrejt Netanyahut, presidenti amerikan përdori tone të forta, duke thënë se kryeministri izraelit duhet të jetë mirënjohës ndaj SHBA-së për rolin e saj në frenimin e kërcënimit iranian. “Ai është një njeri shumë i vështirë. Dhe, për të qenë i sinqertë, duhet të jetë shumë mirënjohës ndaj nesh për atë që kemi bërë. Nëse Irani do të kishte një armë bërthamore, Izraeli nuk do të ekzistonte për dy orë”, deklaroi Trump. Sipas mediave amerikane, presidenti ka shfaqur pakënaqësi në rritje ndaj qeverisë izraelite gjatë javëve të fundit, veçanërisht për shkak të operacioneve ushtarake në Liban, të cilat sipas tij rrezikuan disa herë procesin e negociatave mes SHBA-së dhe Iranit. Trump vlerësoi gjithashtu kontributin e disa aktorëve ndërkombëtarë në avancimin e dialogut diplomatik, duke përmendur presidentin kinez Xi Jinping dhe presidentin rus Vladimir Putin si figura që ndihmuan në krijimin e kushteve për marrëveshjen. Një nga pikat kryesore të marrëveshjes, sipas presidentit amerikan, është garantimi i lirisë së lundrimit në Ngushticën e Hormuzit, një korridor strategjik për tregtinë globale të energjisë. Trump e cilësoi rihapjen e kësaj rruge detare si një sukses të rëndësishëm diplomatik dhe ekonomik. Megjithatë, ai theksoi se marrëveshja nuk do të thotë fund i mosmarrëveshjeve me Iranin. Sipas tij, çështja e programit bërthamor iranian mbetet e hapur dhe do të jetë në qendër të negociatave që pritet të zhvillohen në javët e ardhshme. Trump paralajmëroi se nëse Teherani nuk pranon një marrëveshje që Uashingtoni e konsideron të pranueshme për aktivitetin e tij bërthamor, SHBA-ja mund të rikthejë masa të forta presioni, duke mos përjashtuar as opsionet ushtarake. Deklaratat e presidentit amerikan vijnë në një moment të ndjeshëm për rajonin, ndërsa komuniteti ndërkombëtar po ndjek me vëmendje zbatimin e marrëveshjes së shpallur dhe negociatat e ardhshme që do të përcaktojnë raportet mes Uashingtonit dhe Teheranit, si dhe ndikimin e tyre në sigurinë e Lindjes së Mesme.