Jeffrey Goldberg, kryeredaktor i revistës “The Atlantic”, bëri zbulimin befasues të hënën kur ekipi i sigurisë kombëtare të presidentit Donald Trump, e shtoi atë në një bisedë top-sekrete mbi sulmet ushtarake në Jemen. Dailymail ka shkruar se këshilltari i sigurisë kombëtare të SHBA, Mike Waltz, e përfshiu Goldbergun në aplikacionin Signal, që shfrytëzohet për mesazhe të koduara. Aty ishin edhe sekretari i Shtetit, Marco Rubio, sekretari i Mbrojtjes, Pete Hegseth dhe drejtoresha e Inteligjencës Kombëtare, Tulsi Gabbard. “Duhet të jetë e vetëkuptueshme, por gjithsesi do ta them, se kurrë s’kam qenë i ftuar në një takim të komitetit të drejtuesve të Shtëpisë së Bardhë dhe gjatë raportimit tim shumëvjeçar për çështje të sigurisë kombëtare, nuk kisha dëgjuar kurrë që një i tillë mblidhet në një aplikacion komercial”, ka shkruar ai. Historia tronditëse tregon se detaje operacionale u zbuluan padashur. Sekretari i Mbrojtjes, Hegseth, ish-prezantues i Fox News, tani po hetohet për këtë dështim. “Pete Hegseth, sekretari i Mbrojtjes, më kishte dërguar një mesazh mbi planin e luftës në orën 11:44 të mëngjesit. Bombat filluan të binin në Jemen, në orën 14:00”, ka shtuar Goldberg. Goldberg ka shkruar se në fillim s'mund ta besonte që këshilltari i presidentit Trump për sigurinë kombëtare do të ishte aq i pamatur sa të përfshinte kryeredaktorin në diskutime të tilla. Ai shtoi se s'do t'i zbulojë të gjitha informacionet që u zhvilluan në grup për shkak të sigurisë kombëtare, por tha se informacionet që jepeshin aty ishin zyrtare. Presidenti amerikan, Donald Trump, ka deklaruar se nuk di asgjë për prezencën e kryeredaktorit amerikan në grupin Signal ku rrodhën biseda mbi sigurinë kombëtare. “Nuk di asgjë për këtë. Ju po më tregoni për herë të parë këtë”, është shprehur ai. Megjithatë, Shtëpia e Bardhë e konfirmoi se një gazetar pa dashje u shtua në grupin me zyrtarë shtetërorë ku u diskutua sulmi ndaj rebelëve Huthi.