Një ngjarje e rëndë ka ndodhur sot në Greqi. Ekipi i ekspertëve të kriminalistikës ka qëndruar për disa orë në ballkonin e katit të dytë të një pallati në lagjen industriale Sindos të Selanikut, për të hetuar shkaqet e një rasti të ri të vrasjes së një gruaje nga bashkëshorti i saj, e cila ka tronditur përsëri opinionin publik në Greqi. Ngjarja ka ndodhur mesditën e së mërkurës, kur një 53-vjeçar shqiptar ka vrarë gruan e tij ,pikërisht siç thuhet nga hetimet paraprake, në këtë ballkon. 53-vjeçari e ka sulmuar me thikë gruan e tij 44 vjeçe, duke i shkaktuar asaj plagë të shumta në trup dhe duke e lënë më pas të shtrirë pa jetë, në një pellg gjaku. Më pas ai është hedhur nga ballkoni i katit të tretë te pallatit duke tentuar vetëvrasjen. Nga plagët e marra pas rënies ka humbur jetën kur është dërguar në spital. Forca të shumta policore kanë shkuar në vendngjarje dhe kanë kërkuar të dhëna për të zbuluar shkaqet e krimit dhe dëshmi për marrëdhënien e çiftit. Por sipas fqinjëve ata ishin qiraxhinj të rinj të ardhur vetëm para 15 muajve nga Vollosi, ishin njerëz të qetë dhe kishin një marrëdhënie tipike me banorët e pallatit. Edhe vëllai i gruas së varë që ka mbërritur në vendngjarje sapo ka mësuar tragjedinë, ka deklaruar se kishin mosmarrëveshje të vogla siç kanë të gjitha çiftet. Në gjendje shoku është vajza e madhe 21 vjeç që ka mësuar për vdekjen e prindërve, ndërsa vajzës së dytë , 16 vjeçe , e cila ishte në shkollë, do mësojë të vërtetën me ndihmën e psikologëve. Vitin e kaluar nga 16 rastet të femicidit në vend, tre prej tyre ndodhën në familje shqiptare.