Tre anëtarë të mafias shqiptare, njëri prej të cilëve i lidhur me familjen Gambino, pranuan se u përpoqën të korruptonin një juri në gjyqin kundër Goran Gogic, avokati i të cilit është nipi i njërit prej bosëve të të njëjtit klan me origjinë italiane. Çështja lidhet me sekuestrimin rekord të 18 tonëve kokainë në anijen “MSC Gayane” në vitin 2019, ngarkesë që ishte nisur nga Kili dhe u kap nga autoritetet amerikane. Sipas hetimeve të DEA-s, droga ishte futur në anije në det të hapur përmes motoskafeve që iu afruan mjetit lundrues pas nisjes nga porti. Në qendër të hetimeve ndodhet Goran Gogic, ish-boksier nga Mali i Zi, i cili sipas autoriteteve amerikane drejtonte një rrjet ndërkombëtar trafiku droge të lidhur me mafian shqiptare. Përveç anijes “Gayane”, ai akuzohet edhe për organizimin e dërgesave të tjera të kokainës, të sekuestruara në Nju Jork dhe Filadelfia. Gogic u arrestua në tetor të vitit 2022 në aeroportin ndërkombëtar të Majamit. Gjatë marrjes në pyetje, ai deklaroi para hetuesve se “nuk ishte ndonjë njeri i madh”, duke lënë të kuptohet se pas tij qëndronin figura edhe më të rëndësishme të botës kriminale. Ai kërkoi të bashkëpunonte me autoritetet amerikane në këmbim të rikthimit në Gjermani, ku kishte jetuar prej vitesh, por kërkesa e tij u refuzua. Hetimet morën një kthesë tjetër kur në telefonin e sekuestruar të Gogic u zbuluan llogari të aplikacionit të koduar Sky ECC, platformë komunikimi e përdorur gjerësisht nga grupet kriminale ndërkombëtare. Avokatët e tij tentuan të kundërshtonin provat e siguruara nga hetimet europiane në Francë dhe Belgjikë, duke pretenduar se ato nuk mund të përdoreshin në gjykatë. Mbrojtja e Gogic drejtohet nga Joseph Corozzo Jr., nipi i një prej figurave historike të familjes mafioze Gambino, një nga pesë familjet më të fuqishme kriminale në Nju Jork. Sipas mediave amerikane, lidhjet mes mafias shqiptare dhe asaj italo-amerikane janë bërë gjithnjë e më të forta në trafikun ndërkombëtar të kokainës. Kur strategjia ligjore nuk funksionoi, grupi kriminal dyshohet se tentoi të ndikonte drejtpërdrejt procesin gjyqësor. Në nëntor të vitit të kaluar, tre persona iu afruan një anëtari të jurisë në Staten Island dhe i ofruan 100 mijë dollarë cash në këmbim të një vote në favor të pafajësisë së Gogic. Të arrestuarit janë identifikuar si Afrim Kupa, 53 vjeç, shqiptar me banim në Staten Island; Valmir Krasniqi, 35 vjeç nga Kosova; dhe Mustafa Fteja, 54 vjeç, shqiptar. Sipas autoriteteve amerikane, Kupa ka lidhje direkte me familjen Gambino dhe më herët është dënuar për trafik droge dhe grabitje bankash. Hetuesit zbuluan se të dyshuarit kishin siguruar të gjitha të dhënat personale të anëtarit të jurisë, përfshirë adresën dhe fotografinë e tij. Përballë akuzave për pengim të drejtësisë, që mund t’i çojnë deri në 20 vite burg, të tre pranuan fajësinë dhe kërkuan ulje dënimi. Prokurori federal i Distriktit Lindor të Nju Jorkut deklaroi se tentativa për të korruptuar një juri përbën “një goditje në zemër të sistemit amerikan të drejtësisë”. Ndërkohë, gjyqi ndaj Goran Gogic mbetet i pezulluar, ndërsa autoritetet po marrin masa të reja sigurie për mbrojtjen dhe anonimatin e jurisë. Hetimet vazhdojnë edhe në vende të tjera, pasi emri i Gogic është lidhur me dërgesa droge të sekuestruara në Peru, Panama dhe Holandë. Autoritetet kiliane kanë ngritur gjithashtu alarmin se portet e vendit vazhdojnë të përdoren si pikë tranziti për kokainë me pastërti të lartë drejt tregjeve europiane dhe amerikane. Skandali ka rikthyer në vëmendje edhe familjen mafioze Gambino, e cila dikur drejtohej nga bosi famëkeq John Gotti. Edhe pse sot mban një profil më të ulët, familja mbetet aktive në trafikun e drogës, lojërat e paligjshme të fatit dhe aktivitete të tjera kriminale ndërkombëtare.