Presidenti i Serbisë, Aleksandër Vuçiç, ka shkarkuar nga detyra ambasadoren e vendit të tij në Zagreb, Jelena Miliç. Në deklaratën zyrtare të publikuar këtë të martë nga Serbia për emërimin e ambasadorëve të rinj, thuhet se edhe ambasadorja e Serbisë në Zagreb, Miliç është shkarkuar nga posti i saj dhe se vendimi ka hyrë në fuqi menjëherë, por nuk është dhënë asnjë informacion për arsyen e shkarkimit të ambasadores. Marrëdhëniet Serbi-Kroaci janë acaruar kohët e fundit, pasi Kroacia nënshkroi një marrëveshje për bashkëpunim në fushën e mbrojtjes me Shqipërinë dhe Kosovën. Vuçiç, i cili pretendoi se me marrëveshjen e nënshkruar është nisur një garë armësh në rajon, tha se "Ne e morëm mesazhin. Ne do të bëjmë çmos për të mbrojtur vendin tonë". Nga ana tjetër, Kroacia kishte dhënë mesazhin se mund të bashkëpunonte me cilindo vend që do dhe se nuk pyet Serbinë. Shqipëria, Kosova dhe Kroacia nënshkruan më 18 mars në Tiranë deklaratën e përbashkët të bashkëpunimit në fushën e mbrojtjes. Deklarata është nënshkruar nga ministri i Mbrojtjes i Shqipërisë, Pirro Vengu, ministri i Mbrojtjes i Kosovës, Ejup Maqedonci dhe ministri kroat i Mbrojtjes, Ivan Anushiç. Ndërkohë, ambasadorja serbe në Kroaci bëri bujë pak ditë më parë me sjelljen e saj në një takim në Zagreb, për mbrojtjen e pakicave kombëtare kroate në Serbi dhe të serbëve në Kroaci. Ndërsa mbahej takimi, ambasadorja u largua në mënyrë demonstrative, pasi kritikoi qëndrimin e publikut kroat ndaj këngëtarit që po performonte në takim.