Presidenti i Republikës Çeke, Millosh Zeman i kërkoi falje Serbisë për pjesëmarrjen e vendit të tij në bombardimet e Nato-s në Beogradit në 1999, të cilat parandaluan genocidin. Gazeta serbe Danas thotë se Zeman, këtë deklaratë e bëri pas një takimi me presidentin serb, Aleksandar Vucic. Takimi vetë u zhvillua me dyer të mbyllura, dhe në përfundimin e tij dy liderët iu drejtuan mediave. Vucic ishte pritur me herët në Kalanë e Pragës me nderime ushtarake qe u pasuan nga ceremoni për ndarje cmimesh. Aty, Zeman i dhuroi presidentit serb “Urdhrin e Luanit të Bardhë”, dhe mori prej tij “Urdhrin e Republikës së Serbisë në Shirit”. Pas takimit, Zeman theksoi se ata diskutuan “për miqësinë tradicionale që u zhvillua më 1938 dhe 1968”. “Në të dy rastet, populli serb na dha mbështetje dhe ne i falënderuam ata. Unë kërkoj falje për bombardimin, ishte më keq sesa një krim. Kërkoj nga populli serb të na falë”, deklaroi presideni cek. Bombardimet e Nato-s nisen pas aksioneve të shumta të forcave serbe, djegieve dhe dëbimeve masive në vitin 1998 dhe pas dështimit të Konferencës së Rambujesë për një marrëveshje paqësore me Beogradin. Pasi dështuan edhe përpjekjet e fundit të ndërmjetësueit të atëherëshëm amerikan Richard Holbrooke, bombardimet filluan në 24 mars 1999 në orën 20:00. Sulmet ndaj forcave serbe u ndërprenë më 10 qershor 1999, nje dite pas nenshkrimit te Marrëveshjes Kumanovës, me të cilën Sllobodan Milloshevic, pranoi t'i tërheqë trupat nga Kosova.