Shqipëria po merr pjesë në takimin e ministrave të transportit të organizuar nga qeveria hungareze në Budapest, si mbajtëse e presidencës për BE-në. E pranishme ishte zëvëndëskryeministrja, njëkohësisht ministrja e infrastrukturës dhe energjisë, Belinda Balluku që vlerësoi bisedimet të vlefshme për të ardhmen europiane të vendit tonë. “Ministrat ishin të gjithë prezent në tryezë për të diskutuar cështje të rëndësishme, sic është konkurrenca që krijohet përmes ndërlidhjes së transportit dhe sidomos atij hekurudhor. Ndava në këtë tryezë të nivelit të lartë shqetësimet që ne kemi për sa i përket financimeve që vijnë nga Bashkimi Europian dhe kohës”. Balluku vlerësoi përkrahjen që Bashkimi Europian ka treguar për Shqipërinë, por kërkoi që procedurat e projekteve të përshpejtohen për të pasur rezultat në implementim sa më parë. “Ne vlerësojmë maksimalisht të gjithë mbështetjen financiare që bashkimi europian po jep për sa i përket proejkteve të ndërtimit të hekurudhave sic është rasti i korridoreve të VIII DHE X, por shqetësohemi për kohën e gjatë dhe burokracinë që merr një projekt për tu realizuar”.