Statuja e Lirisë, një nga simbolet më të njohura të lirisë dhe demokracisë është bërë shkak i një grindjeje diplomatike të paprecedentë mes Francës dhe Shteteve të Bashkuara. E ngritur në portin e Nju Jorkut që nga viti 1886, ajo është një dhuratë nga Franca për Shtetet e Bashkuara, e cila ka shërbyer për të simbolizuar miqësinë mes dy popujve dhe, më pas, ka marrë një kuptim të gjerë, duke u bërë një fener shprese për miliona njerëz në mbarë botën. Por thirrja e eurodeputetit francez, Raphaël Glucksmann, i cili u kërkoi amerikanëve “kthimin e Statujës së Lirisë” në Francë, ka ngjallur shumë debate. Në fund reagoi ashpër edhe Shtëpia së Bardhë, nëpërmjet zëdhënëses Karoline Leavitt. Fillimisht ajo nënvizoi rëndësinë që Shtetet e Bashkuara kanë pasur në shpëtimin e Francës nga dominimi gjerman në Luftën e Dytë Botërore dhe me doza ironie shtoi: “Vetëm falë Shteteve të Bashkuara të Amerikës që francezët sot nuk flasin gjermanisht, kështu që ata duhet të jenë shumë mirënjohës për vendin tonë të madh.” Statuja e Lirisë është shpallur Monument Kombëtar në vitin 1924 dhe është përfshirë në listën e Trashëgimisë Botërore të UNESCO-s në vitin 1984.