Dhomat e Specializuara të Kosovës në Hagë kanë shtyrë me të paktën dy muaj shpalljen e aktgjykimit ndaj ish-krerëve të Ushtrisë Çlirimtare të Kosovës, e konfirmuar kjo për REL nga një zëdhënëse e gjykatës. Gjyqi ndaj Hashim Thaçit, Kadri Veselit, Jakup Krasniqit dhe Rexhep Selimit për krime lufte dhe kundër njerëzimit përfundoi në muajin shkurt, dhe vendimi pritej këtë muaj. Megjithatë, zëdhënësja Angela Griep, tha se shpallja është shtyrë deri më 20 korrik “për shkak të kompleksitetit të rastit”, duke shtuar se kjo datë nuk garanton shpalljen e aktgjykimit dhe mund të ketë edhe shtyrje të mëtejshme. Të katër ish kreret e UCK-së i kanë mohuar vazhdimisht akuzat dhe u deklaruan përsëri të pafajshëm në përfundim të gjyqit. Prokurorët kërkojnë dënime prej 45 vjetësh secili, ndërsa mbrojtja këmbëngul për lirimin e tyre, duke përmendur mungesën e provave. Gjyqi ndaj Thaçit, Veselit, Krasniqit dhe Selimit nisi më 2023, ndërsa ata ndodhen në paraburgim në Hagë që nga viti 2020. Gjykata Speciale e Kosovës, me seli në Hagë, përbëhet nga gjyqtarë dhe avokatë ndërkombëtarë dhe u themelua nga Kuvendi i Kosovës në vitin 2015 për të gjykuar ish-pjesëtarët e UÇK-së sipas legjislacionit te Kosoves. Thaçi ishte udhëheqës politik i UÇK-së para dhe gjatë luftës së viteve 1998–1999, Veseli udhëheqës i shërbimit të inteligjencës, Krasniqi zëdhënës, ndërsa Selimi anëtar i shtabit të përgjithshëm.