Këshilli i Mandateve dhe Imunitetit nuk do të mblidhet gjatë këtyre ditëve të fundit të 2025-ës dhe as në ditët e para të vitit që po vjen, për të shqyrtuar kërkesën e SPAK mbi autorizimin për arrestimin e zëvendëskryeministres Belinda Balluku. Kjo pasi Kuvendi ka refuzuar kërkesën e Partisë Demokratike për të mbledhur Këshillin e Mandateve të martën e 30 dhjetorit për mandatin e Ballukut. Kuvendi ka shtyrë pa një afat të caktuar mbledhjen e Këshillit të Mandateve për Ballukun, me argumentin që duhet pritur shqyrtimi i kërkesës se Kryeministrit nga Gjykata Kushtetuese më 22 janar, ndërkohë që edhe pala mbrojtëse e zëvendëskryeministres, në mbledhjen e 19 dhjetorit, kërkoi 3 javë kohë për t’u përgatitur për mbrojtjen ligjore. Deputetët e opozitës, në disa kërkesa të njëpasnjëshme drejtuar Kuvendit, insistojnë që vendimi për zëvendëskryeministren të merret brenda vitit 2025. Ata akuzojnë kryetarin e Kuvendit, Niko Peleshi, se po mbron zëvendëskryeministren.