Një shpërthim i fuqishëm në një fabrikë municionesh dhe eksplozivësh në veri-perëndim të Turqisë i ka marrë jetën të paktën 12 personave e ka plagosur katër të tjerë. Sipas guvernatorit të provinces Balikesir, Ismail Ustaoglu, shpërthimi ndodhi në repartin e prodhimit të gëzhojave. Shkaku i ngjarjes nuk është ende i qartë, por autoritetet e kanë përjashtuar mundësinë e sabotimit. Dëshmitarë okularë rrëfyen sesi panë një lëmsh të zjarrtë të shpërthente nga fabrika, pasuar nga një shtëllungë gjigande tymi të zi. Aq e madhe ishte forca e shpërthimit, sa shkatërroi një pjesë të ndërtesës. Pasojat e mëtejshme erdhën me pjesë prej çeliku që u derdhën në zonën përreth. Shpërthimi shkaktoi lëkundje në të gjithë qytetin Köteyli, thanë dëshmitarët për CNN Turk. Shumë ekipe zjarrfikëse u dërguan më urgjencë në zonë për të shuar me flakët, shoqëruar edhe nga një numër i madh autoambulancash. “Lutem për shpirtrat e qytetarëve tanë që vdiqën në këtë incident dhe shërim të shpejtë për të lënduarit”, shkroi Ustaoglu në një postim në rrjetet sociale. Ministri turk i drejtësisë Yilmaz Tunc njoftoi se një hetim ka nisur menjëherë për zbardhjen e rrethanave të shpërthimit, shkaku i të cilit nuk dihet ende.