Nga Velipoja në Dajç, Zogaj, përmes Liqenit të Shkodrës, në Bajzë e deri në Vermosh, marijuanës shqiptare nuk i mungojnë rrugët e panjohura për t’u futur në Mal të Zi dhe më pas për të furnizuar tregun ballkanik. Alarmin e ka ngritur Radio-Televizioni Publik i Malit të Zi. Sipas medias malazeze, kalimi përmes pikave doganore përbën vetëm një formë klasike transporti, ndërsa pjesa më e madhe e trafikut zhvillohet përmes itinerareve te tjera ujore e tokesore. Radio-Televizioni i Malit të Zi thekson se mes Shqipërisë dhe Malit të Zi vazhdon kontrabanda e drogës përmes Liqenit të Shkodrës, ku ekzistojnë disa kalime të paligjshme, pothuajse të panjohura për qytetarët e zakonshëm, por shumë të njohura për rrjetet e kontrabandës. “Një tjetër rrugë çon drejtpërdrejt përmes Liqenit të Shkodrës, nga fshati turistik i Zogajve në Shkodër deri në Ostros, duke krijuar lidhje ujore e tokesore me zonën e Krajës”, citon media malazeze burimet e saj.