Brenda 6 ditëve nga dhënia e provimit me zgjedhje, janë vlerësuar testet e rreth 27 mijë maturantëve. Rezultatet e testit të fundit për maturantët u shpallën këtë të shtunë të 30 qershorit, kur ishte parashikuar edhe afati limit i korigjimeve në rregullore. Provimi me zgjedhje në biologji, kimi, histori, filozofi, ekonomi, etj kryeson listën e katër provimeve ku janë marr më shumë 10.00, me 306 maturantë ekselentë; pasuar nga matematika me 242, gjuha e huaj me 119 dhe në fund renditet gjuha shqipe dhe letërsia me vetëm 31 nxënës me 10 absoluta. Numri i mbetësve në lëndën me zgjedhje është dyfishi i maturantëve ekselentë, ku janë marr 630 katra. Ndërsa gjuha e huaj shënon numrin më të madh të ngelësve, me 952 maturantë. Kalueshmëria në provimin me zgjedhje rezulton të jetë 97,6% dhe nota mesatare 7.5, si dhe vlerësimi më i shpeshtë është mes grupit të notave 8 dhe 9. Në raport me vitin e shkuar, matura 2024 ka shfaqur performancë të përmirësuar, me dy herë më shumë nota maksimale; teksa është ulur me 116 numri i mbetësve . Qarku me rezultatet më të mira këtë vit në lëndët me zgjedhje është Tirana dhe pas tij renditet Kukësi, ndërsa në vend të fundit klasifikohet Dibra dhe Elbasani. Një ditë pas publikimit të të gjitha notave të provimeve të maturës, maturantët kanë të drejtën të kërkojnë rivlerësimin e testit nëse janë të pakënaqur dhe rikorigjimi duhet të mbyllet brenda datës 7 korrik.