Në raportin e fundit për trafikun e qenieve njerëzore, Departamenti Amerikan i Shtetit ka vlerësuar se qeveria shqiptare ka rritur përpjekjet e përgjithshme krahasuar me një vit më parë. Përpjekjet sipas DASH përfshinin hetimin e trafikantëve të seksit, identifikimin e një numri më të madh viktimash të mundshme në bashkëpunim me organizatat joqeveritare si dhe ofrimin e shërbimeve për më shumë viktima. Raporti i ndan vendet në tre nivele, me Shqipërinë që vijon të jetë pjesë e nivelit të dytë, aty ku ndodhen qeveritë të cilat nuk plotësojnë tërësisht standardet minimale, por bëjnë përpjekje të konsiderueshme për ta arritur një gjë të tillë. Në këtë aspekt raporti nënvizon se Shqipëria nuk i përmbushi standartet në disa fusha kyçe. “Qeveria hetoi në mënyrë të qartë më pak krime që lidhen me trafikimin, ndoqi penalisht më pak të dyshuar si dhe nuk dënoi asnjë trafikant për të dytin vit me radhë”, thuhet në raport. Po kështu konstatohet se policia dhe prokurorët e rretheve nuk kanë përvojën dhe specializimin e duhur për të hetuar dhe ndjekur penalisht rastet e trafikimit dhe se autorët e dyshuar janë dënuar për krime më të vogla, si "shfrytëzim prostitucioni", në vend të trafikimit vijon raporti. DASH lë si detyrë rritjen e kontrolleve nga qeveria në komunitetet më vulnerabël të trafikimit si emigrantët, azilkërkuesit, komunitetet roma dhe egjiptian, si dhe fëmijët. Për Shqipërinë DASH vlerëson se trafikantët janë veçanërisht aktivë në shfrytëzimin për punë dhe seks gratë dhe fëmijët shqiptarë sidomos gjatë sezonit turistik. Disa nga këto punë përfshijnë lypjen si dhe ato të paligjshme si shpërndarja e narkotikëve. Ndërkohë edhe Kosova ka marrë të njëjtin vlerësim nga DASH me specifikën se atje dënimet kanë qenë më të forta për trafikantët, por se rastet e hetuara pësuan rënie.