Kryeministri Edi Rama reagoi ndaj raportit të organizatës Reporterët Pa Kufij për lirinë e medias në Shqipëri, duke kundërshtuar vlerësimet e bëra në raport dhe duke pretenduar se mediat në vend dominohen nga zëri opozitar. Reagimi i Ramës erdhi përmes një postimi në rrjetin social “X”, ku ai publikoi të dhëna që sipas tij bazohen në analiza të inteligjencës artificiale mbi përmbajtjet mediatike në Shqipëri. Sipas kryeministrit, janë analizuar mbi 4 mijë e 500 artikuj në 43 media gjatë 66 ditëve monitorim, ku rezulton se “zëri i opozitës është 3.57 herë më i lartë se ai i qeverisë”, ndërsa burimet kritike ndaj qeverisë dominojnë 4.67 herë më shumë se ato proqeveritare. Rama thekson se toni kritik në media është 6.4 herë më i fortë se mbulimi pozitiv dhe se mbi 15 figura të opozitës janë vazhdimisht të pranishme në titujt kryesorë.