“Të gabosh është njerëzore, por të këmbëngulësh në gabim është djallëzore”. Me këtë proverbë latine të përdorur prej gjyshes së tij katolike, kryeministi Rama vijoi replikën me deputetin britanik Najxhëll Farazh, për numrin e shqiptarëve të dënuar në burgjet britanike. Farazh duke iu referuar një shkrimi të the Telegraf tha se 1 në 50 shqiptarë në Britani ndodhen prapa hekura, por Rama e sfidon prej dy ditësh me shifra. “i dashur Najxhëll, shifrat qartazi nuk janë pika jote e fortë, ndaj le të jemi të qartë: Ti ke humbur”, shkruan rama përmes një statusi në rrjet. Me humbje, kryeministri i referohet bastit që Farazh vuri me të për numrin e shqiptarëve të dënuar. Rama thotë se Farazh pretendon të ketë 53.000 shqiptarë në Britani duke mos llogaritur emigrantët e paligjshëm, “përfshirë më shumë se 12.000 që kanë mbërritur me varka të vogla në vitin 2022. Disa vlerësime sugjerojnë se numri real i shqiptarëve mund të jetë deri në 140.000 çka do të thotë se më pak se një në 100 shqiptarë ndodhet në burg.” Kryeministri shton ndër të tjera se: “Shqiptarët në Britani nuk janë një statistikë që mund të përdoret si dekor për teatrin politik pas-Brexit. Ata janë studentë, akademikë, ndërtues, shoferë, sipërmarrës dhe partnerë. Dhe nëse një në një mijë gabon, kjo nuk e kthen shumicën në kokë turku për konfuzionin tuaj kombëtar. “Ne kemi qëndruar krah për krah me qeverinë britanike, vijon Rama, në uljen drastike të emigracionit të paligjshëm dhe në luftën kundër krimit. Këtë e tregojnë shifrat reale – dhe kjo quhet bashkëpunim. E për t’i treguar më shumë fakte, por edhe për ta njohur më shumë me Shqipërinë, Rama tha se e mirëpret Farazh në Tiranë, si të ftuar nderi. “Të pres në Shqipëri, siç të kam premtuar – për shumë diell, mikpritje të ngrohtë dhe fakte të vërteta”, mbylli Rama reagimin e tij.