Qeveria ndryshon pas 14 vitesh ligjin në administratën publike, duke i dhënë më shumë fokus llogaridhënies dhe duke sjellë një model të ri organizimi. Këshilli i Ministrave miratoi të martën projektligjin “Për disa ndryshime në ligjin për organizimin dhe funksionimin e administratës shtetërore”, me synimin për të rritur llogaridhënien në institucionet publike. “Në funksion të rritjes së llogaridhënies dhe transparencës, projektligji vendos një sistem të unifikuar monitorimi të performancës në administratën shtetërore, duke standardizuar proceset e planifikimit dhe raportimit nga të gjitha institucionet e varësisë te ministritë përgjegjëse. Për herë të parë, raportet e performancës së secilit institucion do të publikohen për qytetarët”. Gjithashtu, projektligji rikoncepton organizimin e institucioneve joministrore, duke i ndarë ato në dy kategori kryesore: institucione varësie dhe agjenci autonome, si dhe kufizon krijimin e institucioneve me numër të vogël punonjësish. Me ndryshimet në ligj, përforcohet roli vendimmarrës i drejtorive të përgjithshme, ndërsa strukturat e reja do të krijohen vetëm kur janë të domosdoshme, me mandat të kufizuar në kohë dhe të lidhur me objektiva të përcaktuar qartë. “Projektligji forcon rolin e drejtorive të përgjithshme, të cilat do të jenë tashmë instanca më e lartë vendimmarrëse për proceset rutinore, përveç rasteve kur ligji ngarkon ministrin ose sekretarin e përgjithshëm për marrjen e vendimit, duke reduktuar centralizimin aktual të vendimmarrjes. Një nga elementët kryesorë të reformës është përcaktimi i kritereve për kalimin e institucioneve në varësi të Kryeministrit, me synimin për të shmangur mbingarkesën e qendrës së qeverisjes dhe për të garantuar fokusimin e saj te koordinimi ndërsektorial dhe prioritetet strategjike të qeverisë”.